أسهل طريقة لعمل اعلان ممول على الفيس بوك 2023

أسهل طريقة لعمل اعلان ممول على الفيس بوك

بتدور ازاى تعمل اعلان ممول على الفيس بوك بس بتلاقي طرق كتير وحسيت انك تايه؟ مش عارف ايه الطريقة المناسبة للبيزنس الخاص بيك ؟ في المقالة دي هنقولك ازاي تعمل اعلان ممول على الفيس بوك بنفسك بأسهل طريقة ممكنة.

كل اللي عليك انك تتابع خطوة خطوة.

1- تحديد هدف الحملة الإعلانية:

السر وراء نجاح اعلانك الممول على فيس بوك هو انك تبقى عارف عايز تعمله ليه؟

بكل بساطة تحدد ايه الهدف من عمل اعلان ممول على الفيس بوك قبل ما تبدأ انك تعمله بالفعل، يعني مثلا لو انت لسه بادئ مشروع جديد وعايز الناس تعرف عن منتجاتك او خدماتك وتوصل لأكبر عدد من جمهورك المستهدف يبقى في الحالة دي هدفك الاعلاني هيكون زيادة الوعي بعلامتك التجارية على عكس لو انت هدفك انك تزود عدد زيارات الزوار لموقعك الالكتروني، وقتها هتختار هدف زيارات الموقع.

2- تحديد نوع الحملة الإعلانية:

ماذا بعد تحديد هدفك الإعلاني؟

دلوقتي انت حددت هدفك وكتبته في ورقة قدامك صح؟ محتاج تسأل نفسك اعلانك الممول على الفيس بوك له علاقة بقضية اجتماعية أو انتخابات مثلا او اي موضوع سياسي تاني، لو كانت اجابتك بالموافقة على السؤال ده هتحدد ده في خانة

“الفئات الإعلانية الخاصة” أو اتركها لو كان الهدف من الإعلان مختلف.

كمان ممكن انك تجرب اختبارات A\B، بأنك تغير التصميم، وتقوم بعمل اعلان ممول على الفيس بوك مرة تانية بالتصميم الجديد، وبعدين قارن بين الإعلانين وايه اللي حقق نجاح أكبر لأهدافك، لكن خلي بالك انك لازم تغير حاجة واحدة بس في كل مرة. خلي بالك كمان من الوقت لان لازم انك تثبت كل العوامل زي: الوقت، وموقع الفئة المستهدفة، واهتماماتها، والصور اللي فيها تصميم ونصوص، وتقوم بتغيير حاجة واحدة بس منهم.

3- حدد ميزانيتك:

في الخطوة دي هتقوم بتحديد الصفحة اللي هتعمل فيها اعلان ممول على الفيس بوك لو كان عندك اكتر من صفحة على الفيس بوك، وكمان ممكن تفعّل خاصية التصميم الديناميكي اللي هتوفر لك عناصر تصميمية تلقائيًا زي الصور أو العناوين عشان تكون مناسبة اكتر مع اهتمامات عملائك.

خيارات الميزانية كمان ممكن تحددها تبع اليوم أو فترة الحملة ككل، خلى بالك أن الميزانية اليومية رقم تقريبي، على سبيل المثال لو الميزانية اليومية 10$ لمدة 10 أيام، هتصرف في بعض الأيام 8$، وفي الأيام التانية 12$، لكن مش هتعدي 100$ لما تنتهي الحملة بأي حال من الأحوال.

اللي بيميز اختيار “ميزانية الحملة بأكملها” هو أنك هتكون قادر على تشغيل الإعلانات تبع جدول زمني أنت محددة، يعني ممكن انك تحدد ظهور اعلان ممول على الفيس بوك للجمهور من الساعة 7 بليل حتى الساعة 10 بليل، سواء بتوقيت جمهورك المستهدف أو بتوقيتك المحلي، وده هيفيدك جدا لو قدرت تعرف ايه هو اكتر وقت بيكون فيه جمهورك المستهدف نشيط على الفيس بوك.

4- تحديد الجمهور المستهدف

تحديد جمهورك من أهم الخطوات اللى هتسهل عليك نجاح حملتك الإعلانية. من الطبيعي انك خلاص حددت افضل شخصية شرائية للعملاء من قبل ما تبدأ في تسويق منتجاتك لهم.

كمان فيس بوك بيوفر لك انك تختار ما بين إنشاء جمهور جديد أو تحديد جمهور محفوظ، لكن بما أن دي حملتك التسويقية الأولى على فيس بوك، يبقي لازم تحدد كذا عامل:

موقع العميل

ممكن أنك تختار بلد معينة أو أكتر من بلد، كمان تقدر تختار مدينة أو اكتر من مدينة، بالاضافة انك تقدر تحدد نطاق جغرافي للإعلان. كمان بيوفر لك فيس بوك عرض الإعلان لكل من:

• الأشخاص المقيمون أو الموجودون مؤخرًا في الموقع الذي حددته.
• الأشخاص الذين يقيمون فقط.
• الأشخاص المتواجدون مؤخرًا فقط.
• الأشخاص المسافرون لهذا المكان.
  

عمر العميل وجنسه

الخطوة دي مهمة عشان تعمل اعلان ممول على الفيس بوك، انك تحدد العمر المثالي للعميل المستهدف لان ده هيقلل من الميزانية اللي هتدفعها، كمان هيحقق لك عائد أعلى وأنجح، كمان فيس بوك يتيح لك اختيار سن العميل بدءًا من 13 سنة إلى 65 سنة. وكمان يكون عندك دراية كبيرة ان يبقى في توافق من منتجك مع جنس الجمهور.

لو مثلا بتقدم ماكينات حلاقة للرجال، فمن الطبيعي أن يكون استهدافك عند عمل اعلان ممول على الفيس بوك على الرجال بس اللي يتراوح سنهم ما بين 18 سنة إلى 45 سنة مثلًا، وكمان لو هتعمل اعلان ممول على الفيس بوك لمستحضرات التجميل النسائية أو الملابس المخصصة للأمهات. عشان كده التوافق بين جنس العميل والمنتج ده اهم حاجة لنجاح اعلانك الممول.

الاستهداف التفصيلي

الاستهداف التفصيلي عملية إضافة اهتمامات أو سلوكيات معينة يتبناها العميل المستهدف لما تعمل اعلان ممول على الفيس بوك، ممكن تحدد الإعلان بناءً على مستوى التعليم، أو عدد سنوات الدراسة، أو لو كان الأشخاص مخطوبين، أو على حسب سلوكهم الشرائي، أو تبع لاهتماماتهم باللياقة البدنية مثلًا.

كمان ممكن أنك تعكس الموضوع، وتستبعد أشخاص مُعينين ينطبق عليهم سلوكيات أو اهتمامات مش عايز تستهدفها لما تعمل اعلان ممول على الفيس بوك. لاحظ انك مش هتقدر تفعل خاصية الاستهداف التفصيلي لو كان جمهورك المستهدف أقل من 18 سنة، وده بسبب التخوف العالمي من تأثير الإعلانات على قرارات وسلوكيات المراهقين.

جهات التواصل

ممكن تستهدف الأشخاص المعجبين بصفحتك لو عندك عدد كبير من المتابعين اللي عايز انهم يشاركوا ويتفاعلوا مشاركتهم على منتجاتك او خدمات شركتك، أو تستهدف الأشخاص اللي تتشابه سلوكياتهم واهتماماتهم مع معجبين صفحتك، وتقدر انك كمان تستبعد المعجبين، كل ده بيتوقف في النهاية على حسب أهدافك التسويقية وسلوك العميل.

اختيار المواضع

خلي بالك من النقطة دي عشان ممكن تعرضك انك تخسر فلوس كتير من غير ما تحقق النتيجة اللي منتظرها، في الغالب يقوم فيس بوك بتشجيعك على تفعيل المواضع التلقائية اللي هيعرض فيها إعلانك، يعني التسويق للمنتج تلقائيًا على فيس بوك وإنستجرام وAudience Network، يبقي لازم تلغي المنصات اللي مش محتاجها.

وهنا ممكن تخصص المكان المناسب لعمل اعلان ممول على الفيس بوك، وكمان هتقدر انك تتحكم في ظهور الصفحة الرئيسية للفئة المستهدفة (آخر الأخبار)، أو في القصص Facebook stories، أو سوق الفيسبوك Facebook Marketplace، وكل ده يتوقف على خطتك التسويقية من البداية.

تنسيق الإعلان

هتقدر انك تتحكم في الإعلان وتحدد لو كنت عايز تعمل اعلان ممول على الفيس بوك جديد ولا التسويق لبوست حالي على صفحة الفيس بوك، كمان التحكم في تنسيق الإعلان اللي حددته، سواءً كنت عايز تعمل اعلان ممول على الفيس بوك على هيئة صورة أو فيديو واحد، أو إعلان دوار، أو إعلان تشكيلة، أو حتى ممكن تعمل اعلان تجارب فورية على موبايلك.

هتلاقي كمان خيارات تصميم اعلان ممول على الفيس بوك، انك تحمّل صورة أو فيديو الإعلان، وتكتب النص الأساسي اللي يحفز الجمهور على اتخاذ إجراء معين تجاه منتجك، وبعدين تنتقل لكتابة عنوان ووصف الإعلان يكون متوافق مع اهدافك. ولو كنت عايز زيادة عدد الزوار لموقعك الالكتروني، يبقي الافضل انك تضع لينك URL الخاص بموقعك.

كمان ممكن تحفز المستخدمين انهم يعملوا إجراء Call To Action معين، بالاضافة ان الفيس بوك بيوفر كتير منها زي: تسجيل ومشاهدة المزيد وغيرها، أو ممكن تسيبها فاضية لو كان هدف إعلانك مختلف.ده غير انك ممكن تضيف ترجمة آلية/ يدوية للإعلان عشان يوصل للجمهور المستهدف على حسب لغة موبايله او الكمبيوتر.

وبكده احنا قولنا كل الخطوات اللي تخليك جاهز انك تعمل اعلان ممول على الفيس بوك دلوقتي. اضغط على اختيار “انشر”، واستني لحد ما ينتهي فريق فيس بوك من مراجعة الإعلان عشان يتأكدوا انه خالي من أي انتهاكات لسياسة الإعلانات الخاصة بالموقع، وفي الغالب مراجعة إعلانات فيس بوك بتحتاج 24 ساعة، وفي كمان الاستثناءات للحالات الخاصة.

ملخص

تعرف ان في اكتر من 42 مليون مستخدم على الفيس بوك مستعد انه يشوف اعلاناتك. عشان كده لازم تستغل ده وتعرف ازاي تعمل اعلان ممول على الفيس بوك. في المقالة دي احنا وضحنا الحل الاسهل على الاطلاق اللي هيخليك تعمل اعلان ممول على الفيس بوك دلوقتي من غير ما ترهق نفسك وتدور كتير.

من ضمنها انها تكون محدد هدفك الإعلاني وتحدد الجمهور المستهدف بكل تفاصيله عشان تقدر تستهدفه بسهوله من غير ما تكلف نفسك فلوس كتير أو من غير ما تحقق نتائج. عشان كده لو عايز تزود مبيعاتك في الحالة دي هتختار الهدف الاعلاني يكون المبيعات اما لو هدفك ان جمهورك المستهدف انه ينزل التطبيق الخاص بيك يبقى تختار الهدف الاعلاني تنزيل التطبيق. عشان كده تحديد أهدافك اللي عايز توصلها ده اول الطريق لتحقيق أهدافك الإعلانية بطريقة مضمونة.

تقدر تتابع كل مقالاتنا فى ماركتنج بالعربي لو عايز تعرف أكتر عن كل التحديثات اللي بتحصل في عالم السوشيال ميديا

وتعرف اكتر عن ازاي تزود عدد زيارات موقعك الالكتروني وغيرها من المواضيع اللي هتساعدك تنقل البيزنس الخاص بيك لمرحلة تانية أعلى بكتير وتطور من نفسك في مجال التسويق الالكتروني كل لحظة.

يبقى ببساطة محتاج تتابع مقالاتنا كل يوم وتقرأ المقالات الموجودة على موقعنا. وبنشجعك لو عندك أى استفسار ممكن تكتبلنا كومنت وهنتواصل معاك فوراً.