ازاي اعمل اعلان ممول على انستجرام

ازاي اعمل اعلان ممول علي انستجرام

“إزاي أزود عدد الفولورز على إنستجرام؟" دة يعتبر واحد من أكتر الأسئلة اللي بيسألها أصحاب البيزنس المبتدئين وكمان البلوجرز. وأكتر إجابة بيلاقوها هي "اعلان ممول انستجرام". طيب ايه هي طريقة عمل اعلان ممول على إنستجرام وإيه اللي هيوفرهولي وليه أختار إنستجرام فضلًا عن غيره من منصات السوشيال ميديا؟ كل دي اسئلة هنجاوب عليها في المقال دة وهنعرفك كيفية عمل اعلان ممول على إنستجرام بالتفصيل.

إيه هو إنستجرام وإيه أهمية الاعلان عليه؟

منصات التواصل الاجتماعي بقت جزء أساسي من حياتنا اليومية، ودي عبارة عن بعض المواقع اللي بيقدروا الناس يعملوا حسابات عليها تسمحلهم إنهم يضيفوا بعض عشان يقدروا يتكلموا، يشاركوا أفكارهم، ويعرفوا أخبار بعض بسهولة ومن غير تدخل في الخصوصيات لأنك بتنشر اللي عايز الناس تعرفه عنك وبس.

ومنصات التواصل الإجتماعي في منها أنواع كتير، إنستجرام واحد منهم. وانستجرام هو منصة خاصة بمشاركة الصور عشان تقدر تسجل لحظاتك الحلوة وتشاركها مع الناس. ولأن المحتوى المرئي هو أكتر حاجة بتوصل المعلومة بدقة وبسرعة فا يعتبر انستجرام واحد من أهم المنصات للإعلان من خلالها.

ليه تختار إعلانات إنستجرام؟

زي ما قولنا إن الصور والفيديوهات بتتميز بقدرتها على توصيل المعلومة بدقة وبسرعة أكتر من المحتوى المكتوب فقط، عشان كدة إستخدام منصة خاصة بالصور والفيديوهات في الإعلان عن منتجك أو خدمتك هو أحسن إختيار. خاصًة إن عدد مستخدمين إنستجرام كبير جدًا وبيكون من فئات المجتمع المُختلفة ولكن أكثرهم بيكونوا من الطبقات العليا عشان كدة لو شايف إن منتجك أو خدمتك أسعارهم مش قليلة يبقى التسويق عن طريق إعلان ممول على انستجرام هيكون إختيار مناسب ومنطقي.

أنواع حسابات انستجرام:

زي ما فيسبوك بيحتوي على حسابات شخصية، صفحات، ومجموعات؛ انستجرام بردو بيحتوي على نوعين من أنواع الحسابات. الحساب الشخصي والحساب البيزنس ودة اللي بيخليك قادر على عمل إعلان ممول على انستجرام. التحويل من الحساب الشخصي لحساب بيزنس بيكون سهل عن طريق الإعدادات ثم الضغط على التحويل إلى حساب بيزنس. بعد التحويل لحساب بيزنس هتقدر بسهولة تعمل اعلان ممول على انستجرام واللي هنقولك على خطواته بالتفصيل في السطور الجاية.

ازاي اعمل اعلان ممول علي انستجرام؟

انستجرام بيعتمد في انتشاره وتسويقه على الهاشتاج زي تويتر. عشان كدة بيكون أهم جزء في أي علان بتنزله على انستجرام انك تختار هاشتاجات مناسبة وعليها تفاعل قوي عشان تضمن ان ناس كتير هتشوف اعلانك بطريقة طبيعية من غير الحاجة لصرف فلوس كتير. ولكن أكيد كيفية عمل اعلان ممول على انستجرام بتختلف وبتكون بأكتر من شكل.

عمل اعلان ممول على انستجرام من خلال Meta business suite:

أول طريقة لعمل اعلان ممول على انستجرام هي عن طريق ربط حساب انستجرام بصفحتك على الفيسبوك وتعمل اعلان ممول من خلال Meta business suite أو الـ Ads manager وتختار إنه يظهر على انستجرام وفيسبوك أو انستجرام بس ولكن دي طريقة مكانتش بتجيب أكبر عدد من النتائج لأن التركيز فيها بيكون على الفيسبوك أكتر من انستجرام.

عمل اعلان ممول على انستجرام من داخل انستجرام:

لو حابب ان اعلانك يوصل لمستخدمين انستجرام بس يبقى محتاج إنك تعمل اعلان من داخل موقع انستجرام نفسه من غير ما تربطه بالفيسبوك ودي طريقة مكانتش موجودة قبل كدة ولكنها بقت موجودة وسهلت كتير على الشركات والأشخاص اللي بيعتمدوا في استهدافهم على مستخدمين انستجرام. ولكن انستجرام مش زي الفيسبوك في تحديد الأهداف أو الـ objectives الخاصة بالإعلان. ودة لأن اعلانات انستجرام الممولة بيكون ليها 3 أنواع من الأهداف؛ الأول هو زيارات لموقعك والنوع التاني هو رسائل سواء كانت عن طريق الواتساب أو رسائل على الأكونت، أما النوع التالت فا هو الإنتشار أو زي ما بنسميه في فيسبوك Reach وهنتكلم بالتفصيل أكتر عن كل هدف من دول في السطور الجاية.

اعلان انستجرام ممول هدفه الرسائل:

لو انت بتسوق لمنتج أو خدمة معينة في أوقات كتير هتحتاج إن الناس المهتمين بيها يدخلوا يبعتولك رسالة يسألوك عن التفاصيل أو عشان يطلبوها على طول وعشان كدة النوع دة من الاعلانات بيتيح لهم زر Send message واللي بيقدروا يبعتوا رسالة بسهولة بمجرد الضغط عليه. والرسائل هنا بتكون نوعين انت بتقدر تختار منهم؛ أول نوع وهو إنهم يبعتولك رسالة على حساب انستجرام نفسه أو النوع التاني وهو إن بمجرد الضغط على زر send message بيتحول العميل تلقائي للواتساب والشات بتاعك عشان يقدر يبعتلك استفساره. ودة بيرجع ليك هل انت محتاج ان الرسائل تكون على انستجرام لو معاك فريق من أكتر من شخص بيردوا على الرسائل فا محتاج إنها تتبعت من خلال مكان كلهم قادرين يوصلوله أو إنها تكون من خلال الواتساب لو في شخص واحد بيرد وحابب ان وصوله للرسائل يكون أسهل وأسرع ومتاح طول الوقت.

زيادة الزيارات لموقعك:

لو شركتك أو البيزنس بتاعك له موقع الكتروني فا غالبًا بتحتاج إن الناس تدخل على الموقع بشكل متكرر لأن الدخول على الموقع هيزود فرصة إنهم يختاروا أكتر من منتج مش بس انهم يختاروا المنتج اللي معروض في الاعلان. دة غير ان زيادة عدد الزيارات على موقعك بتحسن من أداء محركات البحث الخاصة بموقعك واللي اتكلمنا عنه بالتفصيل في المقال اللي فات وتقدر ترجعله من هنا.

زيادة الزيارات لصفحتك:

أكيد سمعت كتير عن إعلان هدفه reach من غير ما تكون فاهم أوي إيه هو الهدف دة وإيه أهميته. الـ reach بإختصار هو الإنتشار أو ان اعلانك يشوفه عدد أكبر من الناس وتقدر بمحتوى مختلف وجذاب تخليهم مهتمين فا يعملولك فولو وكمان يبعتولك رسائل. والنوع دة من الأهداف بيكون مهم جدًا في مرحلة الإنتشار أو أول مرحلة من مراحل رحلة المُشتري واللي بيكون هدفك فيها الوصول لأكبر عدد من الناس المهتمين بمجالك لأن في المرحلة دي هدفك الأساسي بيكون نشر الوعي والمعلومات عنك من غير الإعتماد على المبيعات بشكل قوي لأن ببساطة إنت محتاج تعمل قاعدة قوية تخلي المستخدمين يثقوا فيك عشان يقدروا بعد كدة ياخدوا قرار الشراء منك.

كيفية عمل اعلان ممول على انستجرام:

على عكس الفيسبوك، الإعلانات على إنستجرام بتكون على حاجات انت بالفعل نشرتها على حسابك. عشان تفهم دة أكتر لازم تكون عارف إن الفيسبوك فيه نوعين من الاعلانات نوع بيكون على الصفحة ونوع بيكون خارج الصفحة أو Dark Ad ودة بيكون بوست بتنزله عشان يكون اعلان فقط من غير ما يشوفه الناس اللي هتدخل صفحتك. ولكن الوضع في إنستجرام مُختلف لأن النوع التاني مش موجود فيه أصلًا غير من خلال Meta business suite ولكن من داخل انستجرام نفسه بيكون الطريقة الوحيدة هي الـ boost post أو دعم المنشور بفلوس عشان يوصل لناس تانية غير اللي عاملين فولو ليك. وعشان تقدر تعمل دة بيكون من خلال الموبايل لأن انستجرام بطبعه mobile friendly أكتر يعني بيدعم استخدام الهواتف أكتر من الكمبيوتر أو اللابتوب.

وعشان كدة طريقة عمل اعلان ممول على انستجرام سهلة جدًا ومش مُعقدة وهنقولك دلوقتي الخطوات بالتفصيل.

1. عن طريق التليفون هتدخل على حسابك وتفتح البوست أو المنشور اللي عايز تعمل عليه اعلان.
   
2. هتدوس على كلمة boost post اللي هتلاقيها باللون الأزرق تحت البوست على طول.
   
3. هتختار الهدف بتاعك من الأهداف اللي ذكرناها مسبقًا.
   
4. هتختار العملاء المستهدفين وهنا بيكون عندك فرصة إنك تسيب انستجرام يختار العملاء بنفسه على حسب تحليله لعملائك أو إنك تدوس على create your own عشان تختار بنفسك الفئة اللي عايز الاعلان يوصلها.
   
5. هتختار المنطقة السكنية اللي عايز عملائك يكونوا متواجدين فيها وهنا بتقدر تحدد مصر كلها على سبيل المثال أو تحدد محافظات ومناطق محددة.
   
6. بعد كدة هتبدأ تختار إهتمامات عملائك زي إنهم يكونوا مهتمين بالتسوق أونلاين أو يكونوا مهتمين بالموضة والأزياء وحاجات تانية كتير.
   
7. أخر خطوة في اختيار العملاء هي إنك تختار جنس العملاء بين الذكور والإناث وإنك تختار الفئة العمرية حسب منتجك وتحليلك المسبق لعملائك.
   
8. بعد إختيار العملاء المستهدفين وتفاصيلهم هيبدأ انستجرام يظهر لك العدد المحتمل من العملاء اللى هيشوفوا الاعلان الممول الخاص بيك ولكنه مش بيظهرلك عدد الرسائل المحتمل زي ما بيحصل في Facebook.
   
9. بعد اختيار العملاء المستهدفين هتبدأ تختار التكلفة اللي عايز تدفعها واللي بتبدأ من أول 27 جنيه في اليوم لحد 9 آلاف جنيه في اليوم.
   
10. دلوقتي هتختار مدة الاعلان من أول انه يشتغل لمدة يوم واحد لحد انه يشتغل لمدة 30 يوم؛ وممكن بردو تختار إن الإعلان يفضل شغال لحد ما توقفه بنفسك.
11. آخر خطوة هي بيانات الدفع وهنا بتبدأ تدخل بيانات الكارت الخاص بحسابك البنكي.

وبكدة انت هتكون عملت اعلان ممول على انستجرام وهتقدر تجاوب على سؤالك الدائم "إزاي أزود عدد الفولورز؟" ولكن مش دي وبس الطريقة فا زي ما قلنالك انستجرام منصة مناسبة جدًا لزيادة عدد الفولورز بطريقة مجانية من غير ما تحتاج لإعلان ممول.

إزاي ازود عدد الفولورز على انستجرام مجانًا؟

عشان تقدر تزود عدد الفولورز على انستجرام لازم تكون عارف إن انستجرام بيعتمد بشكل كبير على الهاشتاج على عكس فيسبوك. عشان كدة وانت بتنزل أي صورة أو فيديو على حسابك في شوية حاجات لازم تراعيها هتساعدك جدًا في زيادة عدد الفولورز بشكل طبيعي ومن غير ما تحتاج تدفع فلوس كتير في الإعلانات الممولة على انستجرام.

• اختار هاشتاج مناسب وعليه تفاعل كبير ودة ممكن يتم بطريقة يدوية عن طريق إنك تكتب # وبعدها كلمات متعلقة بمجالك وهتلاقي بعض الإقتراحات ظهرتلك وعدد التفاعل على كل واحد فا تقدر تختار أكتر هاشتاج عليه تفاعل. أو عن طريق برامج مُساعدة واللي بتقولك على أكتر هاشتاجات الناس بتستخدمها في كل مجال زي hashtag generator واللي بيوفرلك أكتر هاشتاجات مناسبة ليك من خلال إنك بتكتب مجالك و اضغط بعدها على كلمة search.
  
• إختيار فيديوهات وصور بجودة عالية تعتبر أهم خطوة للتسويق على انستجرام لأنه في الأساس منصة لمشاركة الصور عشان كدة بيعتمد في تقييمه على جودة الصوة أو الفيديو.
  
• أخر طريقة هتساعدك في إنك تظهر لمستخدمين انستجرام اللي مهتمين بمجالك هي إنك تعمل فولو لعدد كبير من الحسابات اللي بتشتغل في نفس المجال بتاعك لأن دة بيخليك تظهر لأي مستخدم عامل فولو للحسابات دي.

بكدة إنت عرفت أزاي تزود عدد الفولورز على إنستجرام بطريقة طبيعية وكمان كيفية عمل اعلان ممول على انستجرام عشان توصل لأكبر عدد من المستخدمين اللي ممكن يكونوا بعد كدة عملاء دائمين.